पानीले बगाएर मेलम्ची आयोजनाका इन्जिनियरसहित दुई जना बेपत्ता
सिन्धुपाल्चोक । मेलम्ची खानेपानी आयोजनाको सुरुङमा पानीले बगाएर दुई जना बेपत्ता भएका छन् । सिन्धुपाल्चोकको हेलम्बु गाउँपालिका वडा नम्बर– १ अम्बाथानमा रहेको १७ नम्बर गेट फुट्दा पानीले इञ्जिनियर सतिश गोहित र चालक राधाकृष्ण थापा मगरलाई बगाएर बेपत्ता बनाएको प्रहरीले जनाएको छ । त्यसक्रममा बा१झ ६७६४ नम्बरको गाडी समेत बगाएको छ ।
गाडी केही तल खोलामा भेटिएको छ । गोहित र थापासँगै पानीले बगाएका शेखर खनाल र पेम्बा दोर्जेलाई उद्धार गरिएको छ । उनीहरूलाई मेलम्ची क्षेत्रीय अस्पतालमा प्रारम्भिक उपचारपश्चात हेलिकप्टरमार्फत काठमाडौं ल्याइँदैछ । १७ नम्बर गेटमा केही समस्या देखिएपछि मर्मतका लागि गएकाहरूलाई बगाएको हो । आयोजनाको सुरुङ परीक्षणका लागि केही दिनयता पानी हालिएको छ ।
