क्वारेन्टिन व्यवस्थापनमा अनियमितता नभएको सेनाको दाबी

काठमाडौँ । नेपाली सेनाले चीनको वुहानबाट विद्यार्थी उद्धार गर्दा खरिद गरेका र प्रयोग नभएका औषधि गोदाममा रहेको जनाएको छ । बुहानबाट उद्धार गरिएका एक सय ७५ जनालाई भक्तपुरको खरिपाटी क्वारेन्टाइनमा राख्दा सेनाले औषधि खरिदमा ७३ लाख ९८ हजार रुपैयाँ र खानामा ५५ लाख १ हजार ४ सय ३३ रुपैयाँ गरी १ करोड २८ लाख ९९ हजार ४ सय ३३ रुपैयाँ खर्च भएको विवरण सार्वजनिक गरेको थियो ।

तर, क्वारेन्टाइनमा बसेका कसैले पनि औषधि उपचार गर्नु नपरेको बताएका थिए । सेनाले भने यसको प्रतिवाद गर्दै ३ लाख ३३ हजार १० रुपैयाँको औषधि र ६३ लाख ३७ हजार ४ सय ८१ रुपैयाँ औषधिजन्य सामाग्री खरिदमा खर्च भएको दाबी गरेको हो । जेठ २० मा सार्वजनिक गरेको खर्च विवरणमा भने ७३ लाख ९८ हजार रुपैयाँ औषधि खरिदमा खर्च भएको सूचना निकालेको थियो ।