कोरोनामा राजनीति मिसिने खतरा बढ्योः स्वास्थ्यमन्त्री ढकाल
काठमाडौं । स्वास्थ्य तथा जनसंख्यामन्त्री भानुभक्त ढकालले कोरोनामा राजनीति प्रवेश गरेको बताएका छन् । शुक्रबार कान्ति बाल अस्पतालको इ–टिकेटिङ एप्स सार्वजनिक गर्दै मन्त्री ढकालले पछिल्लो समय सरकारविरुद्ध भइरहेका प्रदर्शनहरुलाई लक्षित गर्दै कोरोनामा राजनीति मिसिने खतराहरु बढेको बताएका हुन् ।
उनले कोरोनामा राजनीतिक प्रवेश गरेकाले व्यवस्थापन गर्न कठिन भएको बताएका हुन् । उनले विश्वका अन्य कुनै पनि मुलुकमा राजनीतिक नेतृत्व र सरकारको आलोचना भन्दा पनि कोरनाविरुद्ध कसरी लड्न सकिन्छ भन्ने हिसाबले काम भएपनि नेपालमा त्यसो हुन नसकेको गुनासो गरे । पीसीआर परीक्षणको दायरा बढाउन माग गर्दै पछिल्लो समय सरकारविरुद्ध देशभर प्रदर्शन भइरहेका छन् ।
मंगलबारदेखि काठमाडौंबाट सुरु भएको सरकारविरुद्धको प्रदर्शन अहिले देशव्यापी बन्दै गएको छ । सरकारले कोरोना महामारी नियन्त्रणमा लिएको नीति असफल भएको, खर्च विवरण सार्वजनिक, पीसीआर परीक्षणको दायरा बढाउन माग गर्दै प्रदर्शन भइरहेको छ ।
