फेरि अर्को एक जनाको मृत्युपछि कोरोना संक्रमण पुष्टि

काठमाडौं । जेठ २० गते मृत्यु भएका डोल्पाका एक पुरुषमा कोरोना भाइरस संक्रमण पुष्टि भएको छ । जगदुल्ला गाउँपालिका–३, का ५८ वर्षीय पुरुषमा कोरोना संक्रमण पुष्टि भएको हो । जेठ १६ गते सुर्खेतबाट डोल्पा पुगेका ती पुरुषलाई घरमै राखिएको थियो । लामो समयदेखि दमका रोगी उनी सुर्खेतबाट डोल्पा फर्कने क्रममा बाटोमै मौरे भन्ने ठाउँमा गम्भीर बिरामी परेका थिए ।

१८ गते डोल्पा पुगेपछि उनको आरडीटी परीक्षण गरिएको थियो । आरडीटी रिपोर्ट नेगेटिभ आएपछि घर लगिएका उनको २० गते मृत्यु भएको थियो । मृत्युपछि संकलन गरिएको पीसीआर परीक्षणमा कोरोना संक्रमण पुष्टि भएको कर्णाली स्वास्थ्य विज्ञान प्रतिष्ठानले जनाएको छ ।योसँगै कोरोना संक्रमणबाट नेपालमा मृत्यु हुनेको संख्या १२ पुगेको छ ।