सेनाले भन्यो-जुन र जुलाईमा कोरोना संक्रमितको संख्या बढ्ने अनुमानसँगै तयारी थालेका छौं
काठमाडौं । नेपाली सेनाले काठमाडौं–तराई,मधेस द्रुतमार्ग तोकिएको समयमा नै सम्पन्न हुने दावी गरेको छ । बुधबार सैनिक मुख्यालय भद्रकालीमा पत्रकार सम्मेलन गरी सेनाले कोरोनाको माहामारीले काठमाडौं–तराई,मधेस द्रुतमार्ग निर्माणमा ढिलाई नहुने भन्दै तोकिएको समयमा नै आयोजना सम्पन्न गर्ने दावी गरेको हो ।
पत्रकार सम्मेलनमा नेपाली सेनाका प्रवक्ता बिज्ञानदेव पाण्डेले नेपाल सरकारले निर्देश भएअनुसार द्रतमार्ग बिशेष महत्वको रहेको भन्दै यसको निर्माण कार्य तिव्र रुपमा अघि बढेको र लक्षित समयभित्र पारदर्शी र गुणस्तरिय हिसावले पुरा हुने बताए । हालै सम्पन्न गरिएको अन्तर्राष्ट्रिय परामर्शदाता छनौट कार्यपनि अधिक प्रतिष्पर्धाका साथ स्वच्छता पारदर्शीताका साथ विधमान ऐन कानूनको परिधिभित्र बसेर गरिएको उनले बताए । आगामी आर्थिक बर्षबाट सुरुङमार्ग निर्माण हुने जानकारी पनि उनले दिए ।
त्यस्तै सेनाले आगामी जुन र जुलाईमा कोरोना भाइरसका संक्रमित बढ्ने अनुमान गर्दै त्यसका आधारमा रोकथाम, नियन्त्रण र उपचारका गतिविधि अघि बढाएको जनाएको छ । प्रवक्ता पाण्डेले जुन र जुलाईमा संक्रमितको संख्या बढ्ने अनुमान गरिएसँगै त्यसका लागि तयारी पनि अघि बढाएको जानकारी दिए ।
