सरकारको सर्वत्र विरोध भएपछि पूर्वराजालाई झापाबाट काठमाडौं आउन अनुमति
काठमाडौं । चौतर्फी भारी आलोचना भएपछि सरकारले पूर्वराजा ज्ञानेन्द्र दम्पत्तिलाई काठमाडौं आउने स्वीकृति दिएको छ । पूर्वराजाका सम्वाद सचिव डा. फणिराज पाठकले दिएको जानकारी अनुसार, झापाबाट काठमाडौंका लागि महाराजको सवारी चलिसकेको छ ।
यस्तै राष्ट्रिय सरोकार मन्चका संयोजक तथा वरिष्ठ कर्मनिष्ठ अभियन्ता सोमविक्रम सिंहले पनि पूर्व राजाको काठमाडौं आगमनलाई सहज बनाएकोप्रति सरकारलाई धन्यवाद दिनु भएको छ । उहाँले सरकारको सवारी रोक्ने र पुनः अनुमति दिने वर्तमान सरकारी कदमलाई व्यंग्यात्मक रुपमा आलोचना पनि गर्नु भएको छ ।
यता स्वतन्त्र नागरिक समाजका संयोजक हेमबिक्रम सिलवालले पनि राजदम्पत्तिलाई राजधानी आउन दिने सरकारी निर्णयको स्वागत गर्नु भएको छ । पूर्व राजा रानीलाई राजधानी आउन नदिने निर्णयको जनस्तरबाट चर्को विरोध भएपछि सरकार राजारानीलाई झापाबाट काठमाडौं आउन दिन वाध्य भएको संयोजक सिलवालको कथन छ ।
हिजो नै पूर्व राजदम्पत्ति काठमार्डौ फिर्ने तयारी स्वरुप जिल्ला प्रशासन कार्यालयबाट सवारी पासको अनुमति लिएका थिए । तर माथिको आदेश भन्दै गृहमन्त्रालयले सिडिओ कार्यालयले दिएको अनुमति रद्ध गरेको थियो । त्यसपछि सामाजिक सन्जाल र मिडियामा सरकारी कदमको चर्को विरोध र आलोचना भएको थियो ।
पूर्व राजाको सवारी पास रद्ध गर्ने सरकारी निर्णमा एकदिन पनि नटिक्दै सरकारले फेरि पूर्व राजदम्पत्तिलाई राजधानी आउन दिएको छ । यसबाट सरकारी निर्णय हचुवा र हतारमा हुने गरेको देखिएको छ । गत चैत्र पहिलो साता झापा गएका पूर्वराजा रानी आज राजधानी फर्किन लागेका हुन् ।
