भारतले भूमि अतिक्रमण गरेको विरोधमा नेविसंघद्वारा प्रदर्शन

काठमाडौं । नेपाली भूमि हुँदै भारतले बनाएको सडकको विरोधमा प्रदर्शनमा उत्रिएका नेपाल विद्यार्थी संघका कार्यकर्तालाई प्रहरीले नियन्त्रणमा लिएको छ । विरोध प्रदर्शनमा निस्केका संघका एक सय भन्दा बढी नेता कार्यकर्तालाई प्रहरीले माइतीघरबाट नियन्त्रणमा लिएको हो । फरक फरक समूह बनाई नाराजुलुस गर्दै माइतीघरमा पुग्ने क्रममा प्रहरीले उनीहरुलाई नियन्त्रणमा लिएको हो ।

विरोध प्रदर्शनका क्रममा संघका अध्यक्ष राजीव ढुङ्गाना, महामन्त्रीहरु बलदेव तिमिल्सेना,उर्मिला थपलिया, दीपक भट्टराई , युवराज पाण्डेय, प्रभात दाहालसहितका विद्यार्थी नेता कार्यकर्तालाई प्रहरीले नियन्त्रणमा लिएको हो । सरकारको उदासिनताकै कारण भारतले हस्तक्षेप बढाएको भन्दै सरकार विरोधी नारा लगाएका थिए । यसैबीच नेपाली कांग्रेसले नेविसंघको प्रदर्शनमा प्रहरी हस्तक्षेप भएको भन्दै आपत्ति जनाएको छ ।