चीनद्वारा ४० हजार पीसीआर किट हस्तान्तरण
काठमाडौं । चीन सरकारले नेपाललाई कोभिड–१९ रोकथाम, नियन्त्रण सम्बन्धी मेडिकल सामग्री अनुदानमा उपलब्ध गराएको छ । सोमबार स्वास्थ्य मन्त्रालयमा नेपालका लागि चिनियाँ राजदूत हाउ यान्छीले स्वास्थ्यमन्त्री भानुभक्त ढकाललाई उक्त मेडिकल सामग्री हस्तान्तरण गरिन् । यान्छीले कोरोना परीक्षणका लागि ४० हजार पीसीआर किट हस्तान्तरण गरिन् ।
त्यस्तै चीनले २० हजार एन ९५ मास्क, ८ लाख सर्जिकल मास्क, १० हजार थान मेडिकल चस्मा लगायतका मेडिकल सामग्री हस्तान्तरण गरेको छ । यी सामान गत शुक्रबार र शनिबार गरी काठमाडौं ल्याइएको थियो ।
कार्यक्रममा स्वास्थ्यमन्त्री ढकालले कोरोना संक्रमणसंग लड्न चीनले दिएको सामाग्री प्रभावित क्षेत्रमा पठाइने बताए । चीन सरकारको सहयोगप्रति आभार प्रकट गर्दै उनले नेपाल चीन सम्बन्ध ऐतिहासिक रहेको पनि बताए । राजदूत यान्छीले यो सामग्रीको चीन नेपाल सोलिडारिटीको समन्वयमा उपलब्धता सम्भव भएको आफूहरुले बाचा मात्रै नगरेर काम पनि गरेर देखाउने बताए ।
