यस्तो देखियो नागढुङ्गा नाका पुग्दा

काठमाडौं । नागढुङ्गा हुँदै काठमाडौं उपत्यका भित्रिने सवारी साधन र मानिसको आवागमनका बिषयमा जानकारी लिन काठमाडौं महानगरकी उपप्रमुख हरिप्रभा खड्गी श्रेष्ठ बुधबार काठमाडौं र धादिङ जिल्लाको सिमाना खत्रीपौवा पुगेकी छन् । काठमाडौंबाहिरबाट उपत्यकाभित्र धमाधम मानिसहरु आउन थालेको खवर बाहिरिन थालेपछि अवस्थाका बिषयमा जानकारी लिन उनी नागढुङ्गा हुँदै खत्री चोकसम्म पुगेकी थिइन् ।

त्यस क्रममा उनले नागढुङ्गा र खत्री चोक दुवै ठाउँमा बसेर सवारी साधन भित्रिने गति, भित्र आउने सवारीको प्रयोजन, सवारी र सवारीमा आउने व्यक्तिको अभिलेख राख्ने तरिका अवलोकन गरेकी थिइन् । त्यस्तै सवारी चालकसँग भित्र आउनु पर्ने कारण, कति समय बस्ने, कहाँ बस्ने, सवारी साधन कसरी प्रयोग हुने गरेको छ जस्ता विषयमा जानकारी लिकएकी थिइन् भने मास्क नलगाई सवारी चलाउने चालकलाई मास्क वितरण गरेकी थिइन् । यस्तै कार्यक्षेत्रमा रहेको नेपाल प्रहरी, ट्राफिक प्रहरी, शशस्त्र प्रहरी र नेपाली सेनाका सुरक्षाकर्मीसँग कुराकानी गरेकी थिइन् ।

अवलोकनपछि प्रतिक्रिया दिँदै उपप्रमुख खड्गी श्रेष्ठले भनिन् — रातारात मान्छे काठमाडौं भित्रिए भनेर जुन तहमा खबर बाहिर आएको छ । त्यस्तो डरलाग्दो अवस्था देखिएन । उपत्यकामा आवश्यक पर्ने खाद्यबस्तु, तरकारी ढुवानी गर्ने ट्रकहरु, पेट्रोलियम बस्तु ढुवानी गर्ने साधनहरु, निर्माण सामाग्री ढुवानी गर्ने सवारी साधन, बिरामी बोकेका एम्बुलेन्स भित्रिँदै गरेका भेटिए ।

हामी हरेक नागरिकको सुरक्षा अवस्थाप्रति गम्भीर छौं । उनले भनिन् — नागरिकको आवतजावत गर्ने अधिकारप्रति संवेदनशील छौं । तर, अहिले आवतजावत गर्ने समय होइन । महामारी नियन्त्रण गर्न जो जहाँ हुनुहुन्छ । त्यहीं बसेर सरकारको प्रयासमा साथ दिन आग्रह गर्दछु ।
महानगरीय प्रहरी वृत्त थानकोटका प्रमुख प्रहरी नायव उपरीक्षक घनश्याम श्रेष्ठ धादिङ र काठमाडौको सिमाना खत्री पौवामा थिए । त्यहाँ आएका सवारी साधनको विवरण टिपेर भित्रिन दिने नदिने निर्णय गर्न उनलाई भ्याइनभ्याइ थियो । यसै क्रममा महानगरकी उपप्रमुख खड्गी श्रेष्ठ पुगेपछि उनले अवस्थाका बिषयमा जानकारी दिँदै भने — अत्यावश्यक सामाग्री बोकेका सवारी साधनलाई हामीले प्रवेश दिने गरेका छौं । प्रवेश नगर्दा पनि हुनेलाई यहाँबाट नै फर्काउने गरेका छौं ।

उनले भने — सोमबार हामीले ३७ वटा सवारीलाई यहीँबाट फकायौं भने मंगलबार १०३ वटा फर्कायौं । हामीले काठमाडौंको जनजीवनलाई सहज बनाउन जे सामाग्री आवश्यक पर्छ, ती सवारी साधन पठाउनै पर्छ । अहिले नभएपछि हुने सामाग्री बोक्ने र अहिले काठमाडौं नगएपनि हुनेलाई फर्काउने गरेका हौं ।

उनकाअनुसार अहिले बिदेशी नम्बर प्लेट भएका कुनै पनि सवारीसाधनहरु आउने गरेका छैनन् । काठमाडौंमा आउने खाद्य तथा तरकारी छिमेकी जिल्लाहरु धादिङ्, चितवनलगायत ठाउँबाट आउने गरेका हुन् ।
वृत्त प्रमुख श्रेष्ठका अनुसार अहिले नागढुङ्गा नाकाबाट दैनिक औसतमा ५०० वटा सवारी साधन भित्रिने गरेका छन् ।

ं