स्वास्थ्य अनुसन्धान परिषद्ले नेपालमा कोरोना भाइरसको जिनको अध्ययन गर्ने
काठमाडौं । नेपालमा कोरोना भाइरसको जिनको अध्ययन हुने भएको छ । नेपाल स्वास्थ्य अनुसन्धान परिषद्ले जिनसँग सम्बन्धित विभिन्न वैज्ञानिकसँग छलफल सुरु गरेको छ । कोरोना भाइरसका विभिन्न जिन रहेकाले अध्ययनबाट नेपालमा रहेको कुन जिन हो भन्ने पत्ता लगाइने छ ।
नेपाल स्वास्थ्य व्यवसायी परिषद्का रजिस्ट्रार पुष्पराज खनालले नेपालमा आएको जिन कस्तो प्रकारको रहेको भनेर अध्ययन गर्न थालिएको जानकारी दिएका छन् । उनका अनुसार कोरोना भाइरसका कारण अरू देशमा महामारी फैलिएको र बिरामीको ज्यान जाने अवस्था आएको तर नेपालमा भने सङ्क्रमितको अवस्था सामान्य रहेकाले जिनको अनुसन्धान गर्न थालिएको हो ।
अध्ययनका लागि नेपालमा रहेका भाइरोलोजीमा काम गरिरहेका जिन विज्ञ, संस्था र विदेशमा रहेका वैज्ञानिकसँग छलफल गरिएको छ । अहिलेसम्मको अध्ययनले नेपालमा कोभिड–१९ को लक्षणविना नै सङ्क्रमण देखिएको छ । कुन चाहिँ जिनले मानिसमा सङ्क्रमण भइरहेको छ अध्ययनपछि पुष्टि हुने उनले बताएका छन् ।
परिषद्ले सङ्क्रमितहरूकै स्वाब र रगतबाट जिनको प्रकार पत्ता लगाउने छ । जिनको अध्ययन गरेर नेपालमा रहेको जिनको तहगत वर्गीकरण गरिनेछ । जिन पत्ता लगाएपछि कोरोना भाइरुसको उपचारका लागि आवश्यक भ्याक्सिन र औषधि पत्ता लगाउन सकिने अपेक्षा गरिएको छ ।
