नेपालगंजमा थप सात जना कोरोना संक्रमित फेला, संक्रमितको संख्या ८२ पुग्यो
काठमाडौं । नेपालमा कोरोना भाइरस संक्रमितको संख्या ८२ पुगेको छ । मंगलबार भेरी अस्पताल, नेपालगञ्जको प्रयोगशालामा गरिएको परीक्षणमा ७ जनामा कोरोना संक्रमण पुष्टि भएको हो ।
नेपालगञ्ज उपमहानगरपालिका वडा नम्बर ८ का २२, ३०, ४० वर्षका पुरुष तथा ९, ३२, ३४, र ५५ वर्षका महिलामा कोरोना संक्रमण पुष्टी भएको स्वास्थ्य मन्त्रालयले जनाएको छ । उनीहरुको अवस्था सामान्य रहेको र स्वास्थ्यकर्मीको निगरानीमा रहेको स्वास्थ्य मन्त्रालयका सहप्रवक्ता समिरकुमार अधिकारीले जानकारी दिएका छन् ।
संक्रमित मध्ये १६ जना निको भई अस्पतालबाट घर फर्किसकेका छन् । अन्यको अवस्था पनि सामान्य रहेको मन्त्रालयले जनाएको छ ।