नेकपाको सचिवालय बैठक बस्दै, कसरी फेस गर्लान् प्रधानमन्त्रीले ?
काठमाडौं । सत्तारुढ नेपाल कम्युनिष्ट पार्टीको सचिवालय बैठक आज बस्दैछ । प्रधानमन्त्री केपी शर्मा ओलीको कार्यशैलीलाई लिएर पार्टीभित्र विवाद भइरहेका बेला सचिवालय बैठक बोलाइएको हो । बैठक साँझ ५ बजेपछि प्रधानमन्त्री निवास बालुवाटार बस्नेछ । मंगलबार नै सचिवालय बैठक बस्ने भनिए पनि बसेको थिएन ।
अध्यक्षद्वय ओली र प्रचण्डबीच मंगलबार भएको भेटवार्तापछि आजका लागि सचिवालय बैठक बस्ने तय भएको हो । पार्टी विभाजन गर्ने उद्देश्यले राजनीतिक दलसम्बन्धी अध्यादेश जारी गरेपछि प्रधानमन्त्री ओलीको सर्वत्र विरोध भइरहेको छ । सर्वत्र विरोध भएपछि सरकारले अध्यादेश खारेज गरिसकेको छ ।
तर अध्यादेशको औचित्यबारे प्रधानमन्त्रीले स्पष्ट पार्नुपर्ने भन्दै २० जना स्थायी कमिटी सदस्यहरुले पहिला सचिवालय र त्यसपछि स्थायी कमिटी बैठक डाक्न माग गरिसकेका छन् । उनीहरुले बैठक नबोलाइए आफूहरु कडा कदम चाल्न बाध्य हुने चेतावनी समेत दिएका छन् । ओली पक्ष बैठक नबोलाउने पक्षमा थियो । तर प्रचण्ड र माधव नेपालले दबाव दिएपछि ओली बैठक बोलाउन बाध्य भएका हुन् । आजको सचिवालय बैठकले स्थायी कमिटी बैठकको मिति तय गर्ने बताइएको छ ।
नेकपाका नेताहरुले सरकारको काम गराई ठिक नभएको, पार्टी बदनाम भएको, भ्रष्टाचारका विभिन्न विषय उठेका भन्दै प्रधानमन्त्रीले त्यसको जवाफ दिनुपर्ने बताउँदै आएका छन् ।
