दोस्रो कोरोना संक्रमित विरामी अस्पतालबाट डिस्चार्ज
काठमाडौं । दोस्रो कोरोना संक्रमित प्रसिद्धि श्रेष्ठ निको भएर घर फर्किएकी छन् । चैत १० गते कोरोना संक्रमण पोजेटिभ देखिएको उनी शनिबार टेकुको शुक्रराज ट्रपिकल तथा सरुवा रोग अस्पतालबाट डिस्चार्ज भएकी हुन् ।
काठमाडौंकी ती युवती चैत ४ गते फ्रान्सबाट कतारको दोहा हुँदै काठमाडौं आएकी थिइन् । उनीसँगै नेपाल आएका बागलुङका अरु दुई जनालाई पनि कारोना संक्रमण भएको छ । उनीहरुको धौलागिरि अस्पतालमा उपचार भइरहेको छ ।
यसअघि चीनबाट एक नेपाली पनि निको भएर घर फर्किसकेका छन् । तीन जना कोरोना संक्रमित मध्ये अब २८ जना अस्पतालमा उपचाररत छन् । शुक्रबार उदयपुुरमा कोरोना संक्रमण देखिएका १२ जनालाई कोशी अस्पताल विराटननगरमा भर्ना गरिएको छ । उनीहरुको अवस्था पनि सामान्य रहेको अस्पतालले जनाएको छ ।
