सीमा नाकामा आठ हजार भन्दा बढी सशस्त्र प्रहरी परिचालन
काठमाडौं । छिमेकी देश भारतमा कोरोनाभाइरसको संक्रमण बढ्दै गएपछि सरकारले सीमा क्षेत्रा कडाई गरेको छ । गृहमन्त्री रामबहादुर थापाले भारतसँगको सीमा क्षेत्रमा सशस्त्र प्रहरीलाई थप सुदृढ गर्न संख्या थप गर्न लगाएका हुन् ।
भीआईपीसहित विभिन्न ठाउँमा पठाएका प्रहरीलाई कटौती गरेर सीमासहित समवेदनशील क्षेत्रमा खटाउन गृहमन्त्रीको निर्देशन वमोजिम आठ हजारभन्दा बढी सशस्त्र प्रहरी सीमा क्षेत्रमा खटाइएको सशस्त्र प्रहरी मुख्यालयले जनाएको छ ।
जसमा प्रदेश एकमा खटाउनका लागि मुख्यालयले बराह वाहिनी मुख्यालय सुनसरीमा एक हजार पाँच सय ४९, प्रदेश दुईको छिन्नमस्ता वाहिनी मुख्यालय महोत्तरीमा तीन हजार दुई सय ६२, प्रदेश पाँचको विन्ध्यावासिनी बाहिनी मुख्यालय, रुपन्देहीमा दुई हजार चार सय २०, सुदूरपश्चिम प्रदेशको वैद्यनाथ वाहिनी मुख्यालय कैलालीमा एक हजार एक सय १५ जना खटाइएको छ ।
यस्तै वाग्मती प्रदेश र गण्डकी प्रदेशमा क्रमशः १९ र १८ मात्र खटाइएको छ । यसरी जम्मा आठ हजार आठ सय ८३ जना थप सशस्त्र प्रहरी कोरोनाका विरुद्ध सीमा र समवेदशील क्षेत्रमा खटाइएको छ ।
