थप दुई जना कोरोना संक्रमित फेला, संक्रमितको संख्या १४ पुग्यो
काठमाडौं । नेपालमा थप दुई जना कोरोना संक्रमित फेला परेका छन् । कैलालीकी ६५ वर्षीया महिला र रौतहटका १९ वर्षीय पुरुषमा कोरोना भाइरस पोजेटिभ देखिएको हो । राष्ट्रिय जनस्वास्थ्य प्रयोगशालामा परीक्षणका क्रममा उनीहरुका कोरोना पोजेटिभ देखिएको स्वास्थ्य मन्त्रालयका प्रवक्ता विकास देवकोटाले जानकारी दिनुभयो । योसँगै नेपालमा कोरोना संक्रमितको संख्या १४ पुगेको छ ।
एकजना उपचारपछि निको भएर घर फर्किसकेका छन । सेती प्रादेशिक अस्पताल धनगढीमा पाँचजना, नारायणी अस्पताल वीरगंजमा तीनजना तथा शुक्रराज ट्रपिकल तथा सरुवा रोग अस्पताल टेकु र बाग्लुङमा दुई दुई जनाको उपचार भईरहेको प्रवक्ता देवकोटाले बताउनुभयो ।
मन्त्रालयका अनुसार हाल ५२ जिल्लामा र्यापिट किटबाट परीक्षण भइरहेको छ । अहिले ७ हजार १ सय ६६ जना क्वारेन्टाइनमा, १०३ आइसोलेशनमा रहेका मन्त्रालयले जनाएको छ । त्यस्तै २ सय २६ जना रेड जोनमा छन् ।
