चिकित्सकको तलब कटौती गरिएको छैनः स्वास्थ्य मन्त्रालय
काठमाडौं । स्वास्थ्य मन्त्रालयले स्वास्थ्यकर्मी तथा चिकित्सकको तलब भत्ता कटौती गर्न कुनै पनि सूचना जारी नभएको जानकारी दिएको छ । शुक्रबार स्वास्थ्य मन्त्रालयको नियमित पत्रकार सम्मेलनमा मन्त्रालयका प्रवक्ता डा. विकास देवकोटाले तलब कट्टाका लागि कुनै पनि पत्राचार नभएको जनाकारी दिएका हुन् ।
चैत ११ गते मन्त्रिपरिषद्को बैठकले सरकारी सेवामा आवद्ध सबैको तलब कट्टाको घोषणा गरे पनि अहिलेसम्म मन्त्रालय अन्तर्गत कुनै पनि कर्मचारीको तलब नकाटिएको प्रवक्ता देवकोटाले जानकारी दिए । सरकारले तीनै तहका निजामती तथा सरकारी कर्मचारिको तलब कटाएर उक्त कोषमा जम्मा गर्ने निर्णय गरेको थियो ।
संक्रमण विरुद्ध सबैभन्दा बढी खट्नुपर्ने स्वास्थ्यकर्मी र सुरक्षाकर्मीको तलब कटाएर कोषमा जम्मा गरिएको भन्दै चौतर्फी विरोध भइरहेको थियो । स्वास्थ्यकर्मीहरूलाई उच्च मनोवलका साथ संक्रमण विरुद्धको लडाईंमा खट्नका लागि अनुरोध गरेको प्रवक्ता देबकोटाले बताए ।
उनले अहिले मुलुकभर क्वारेन्टाइनमा ८ हजार ६ सय ६० जना, आइसोलेशनमाा १२५ जना रहेका जानकारी दिए । त्यस्तै कोरोना संक्रमित ८ जनाको अवस्था सामान्य रहेको उनले बताए । उनले बिभिन्न प्रदेशबाट कोरोना परीक्षणको काम तिव्र रुपमा अघि बढिरहेको पनि बताए ।
