नेपालमा कोरोनाका नयाँ तीन जना संक्रमित फेला
काठमाडौँ । स्वास्थ्य मन्त्रालयले नेपालमा थप तीन जना कोरोना भारइस संक्रमित फेला परेका बताएको छ । मन्त्रालयको आधिकारिक फेसबुक पेजमा तीन जना नयाँ संक्रमित फेला परेका जानकारी दिइएको हो ।
संक्रमितमा भारतको मुम्बइबाट फर्किएका कैलालीका २१ वर्षीय पुरूष, भारतकै उत्तराखण्डबाट फर्किएका कञ्चनपुरका ४१ वर्षीय पुरूष र कैलालीकी ३४ वर्षीय महिला रहेको मन्त्रालयले जनाएको छ ।
यी महिला यसअघि कैलालीमा भेटिएका संक्रमित पुरूषकी आफन्त भएको पनि मन्त्रालयले जनाएको छ । योसँगै पहिलो पटक नेपाल भित्रै अर्को व्यक्तिमा कोरोना संक्रमण भएको पनि पुष्टि भएको छ ।
यसअघि नेपालमा छ जनामा कोरोना संक्रमण देखिएको छ । तीमध्ये एकजना उपचारपछि निको भइसकेका छन् भने अन्यको उपचार भइरहेको छ।
