स्वास्थ्य सेवा विभागद्वारा मेडिकल सामग्री खरिद सम्झौता रद्द
काठमाडौं । सरकारले कोरोना भाइरसको रोकथाम र उपाचारका लागि मेडिकल सामग्री खरिदका लागि गरेको सम्झौता रद्ध गरेको छ । स्वास्थ्य मन्त्रालयद्वारा बुधबार आयोजित नियमित पत्रकार सम्मेलनमा स्वास्थ्य सेवा विभागका महानिर्देशक महेन्द्र श्रेष्ठले खरिद सम्झौता रद्द गरेको जानकारी दिएका हुन् ।
सम्झौता गरेको कम्पनीले ३० तारिखसम्म सामग्री ल्याउनुपर्नेमा ल्याउन नसकेकाले सम्झौता रद्द गरेको बताए । उनले अब सामग्री खरिदका लागि आह्वान गर्ने र पाँच दिनभित्र ल्याउन समयसीमा दिइने बताए । उनले भने, ‘३० तारिख सम्म ल्याउनुपर्ने थियो । उहाँहरुले दश प्रतिशत ल्याउनुभएको छ । बिहीबार दोस्रो लट ल्याउनुपर्ने छ तर उहाँहरुले ल्याउने सम्भावना छैन । उहाँहरुको अब धरौटी जफत गरी कालोसूचीमा राख्ने प्रक्रिया सुरु भइसकेको छ ।’
सरकारले औषधि खरिदका लागि ओम्नी बिजनेस कर्पोरेट इन्टरनेशनल प्रालि (ओबिसिआई)संँग सम्झौता गरेको थियो । मेडिकल सामग्री खरिदलाई लिएर सरकारको सर्वत्र आलोचना भएको थियो । स्वास्थ्य मन्त्री भानुभक्त ढकालविरुद्ध अख्तियारमा उजुरीसमेत परेको छ ।
