चोर खोज्न बर्दीमा नेपाल छिरेका भारतीय प्रहरीले मागे माफी
सुर्खेत । भारतको हरियाणा प्रदेशस्थित एक घरमा काम गर्ने कामदार चोरी गरी फरार भएपछि खोजी गर्दै पोशाकमा दैलेख पुगेका भारतीय प्रहरीले माफी मागेका छन् । जिल्ला प्रहरी कार्यालय दैलेखका निमित्त प्रमुख प्रहरी निरीक्षक नैनबहादुर साउदका अनुसार दैलेखका ती कामदारले भारतको हरियाणा प्रदेशस्थित एक घरमा परिवारलाई खानामा विष मिलाएर चोरी गरी भागेका थिए ।
घरका ७ जना सदस्यलाई उनले खानामा विष मिलाएर बेहोस बनाएर घरबाट २५ लाख भारु चोरेर भागेका एक जनाको ठेगाना फरक फरक भए पनि त्यसलाई निश्चित गर्न उनीहरू आएका साउदले जानकारी दिए ।
साउदका अनुसार प्रहरी नायब निरीक्षक विजय विवेकको कमाण्डमा अरु दुई जना जवान दैलेख आएका छन् । पोशाक नै लगाएर आएकाले आफूले सम्झाएपछि उनीहरूले माफी मागेका प्रहरी निरीक्षक साउदले बताए । साउदका अनुसार भारतीय प्रहरीसँग हरियाणा प्रदेशका एक जना स्थानीय समेत आएका छन् ।
