नीतिमा संघीयता र नियतमा केन्द्रीयताले समस्या जन्मायो : मुख्यमन्त्री राउत
जनकपुरधाम । प्रदेश दुईका मुख्यमन्त्री लालबाबु राउतले नीतिमा संघीयता रहेपनि कार्यान्वयन गर्ने संघीय सरकार र उच्च कर्मचारीतन्त्रका नियत केन्द्रीयता नै रहेकोले समस्या जन्माएको बताएका छन् ।
नेपाल नगरपालिका संघले मंगलबार जनकपुरमा आयोजना गरेको संविधान प्रदत संघ प्रदेश र स्थानीय तहको एकल तथा साझा अधिकार अन्तर्गत प्रयोगमा आएका नीति गत समस्या र चुनौती बारे अन्तर सरकार सम्बाद कार्यक्रममा मुख्यमन्त्री राउतले सो कुरा बताएका हुन् ।
उनले संविधानमा सुनिश्चित गरिसकेको प्रदेश र स्थानीय तहको अधिकारलाई समेत संघीय सरकारले संविधान विपरितका ऐनहरु निर्माण गरेर संविधान प्रदत अधिकारलाई कुण्ठित गर्दै संघीयतालाई मास्ने षडयन्त्र गरेको आरोप लगाए ।
संघीयता समाप्त हुने र फेरि आफूहरुको रजाई हुने मानसिकता बोकेका उच्च कर्मचारीहरुले संविधान कार्यान्वयमा विभिन्न बखेडा झिकिरहेको उल्लेख गर्दै उनले भने,‘ संघीयता समाप्त हुन्छ भन्ने दिवास्वप्न नदेखे हुन्छ । संघीयता ल्याउने मधेशी जनता र प्रदेश २ को सरकार संघीयतालाई स्थापित गर्न जुन सुकै मुल्य चुकाउन तयार छ ।’
मुख्यमन्त्री राउतले बजेटको असमान बाँडफाँटले संघीयता कार्यान्वयनमै समस्या उत्पन्न गरेकाले अब स्थानीय तहलाई ३० प्रतिशत , प्रदेशलाई ३० प्रतिशत र संघलाई ४० प्रतिशत बजेटको बाँडफाँट गराउन प्रदेश र स्थानीय तहलाई एक जुट भई अवाज उठाउनु पर्ने बताए ।
