सैनिक मञ्चमा विशेष कार्यक्रम गरी सेना दिवस मनाइयो
काठमाडौं । नेपाली सेनाले काठमाडौंको टुँडिखेलस्थित सैनिक मञ्चमा विशेष कार्यक्रम गरी सेना दिवस मनाएको छ । कार्यक्रममा राष्ट्रपति विद्यादेवी भण्डारी सरिक भएकी थिइन् ।
नेपाली सेनाले कार्यक्रममा राइफल र तोपबाट महाशिवरात्रीको बढाइँ समेत गरेको छ । त्यसैग्री बढाइँ कवाज अन्तर्गत नेपालको झण्डा, लहरे, एकठ्ठा, षट्कोण अनकार र सेना दिवस २०७६ को आकृति समेत प्रस्तुत गरिएको थियो । त्यसैगरी नेपाली सेना र नेपालको परम्परागत भेषभुशा झल्कने विविध कला, नृत्य र संगीतको धुन प्रस्तुत गरिएको थियो ।
सेनाको बढाइँ हेर्न टुँडिखेल वरिपरि सर्वसाधारणहरुको घुइँचो लागेको थियो । नेपाली सेनाले २०४७ सालदेखि महाशिवरात्रिको दिनलाई सेना दिवसका रूपमा मनाउँदै आएको छ ।
शास्त्रीय मान्यताअनुसार शिवलाई शान्ति र सुरक्षाको प्रतीकका रूपमा लिइन्छ । भगवान् शिवका प्रतीकहरू अङ्कित लोगोले साङ्केतिक रूपमा सेनाको शक्तिलाई जनाउँछ । यसबाट नेपाली सेना देशका सबै प्रकारका राष्ट्रिय सङ्कटहरू निराकरण हुने विश्वास गरिँदै आएको छ ।
