नेपाल र चीनबीच फौजदारी विषयमा पारस्पारिक कानुनी सहायता सम्बन्धी सन्धि स्वीकृत

काठमाडौं । सरकारले चीनसँग फौजदारी विषयमा पारस्परिक कानुनी सहायतासम्बन्धी सन्धि स्वीकृत गरेर जानकारीको निम्ति संघीय संसदमा पठाउने निर्णय गरेको छ । बिहीबार मन्त्रिपरिषदको बैठकका निर्णय सार्वजनिक गर्न आयोजित पत्रकार सम्मेलनमा सरकारका प्रवक्ता एवं सञ्चार तथा सूचना प्रविधिमन्त्री गोकुल बाँस्कोटाले सन्धिलाई पछिल्लो मन्त्रिपरिषद् बैठकले स्वीकृत गरेको जानकारी दिएका हुन् ।

नेपालले यस्तो सन्धि गरेको चीन पहिलो देश हो । गत असोजमा चिनियाँ राष्ट्रपति सी जिनपिङको भ्रमणका बेला उक्त सन्धिमा प्रारम्भिक हस्ताक्षर भएको थियो । उक्त सन्धिमा निहित पारस्परिक सहयोगको विषय राजनीतिक वा सैन्य कसुर गरेका कसुरदारको हकमा लागु नहुने बताइएको छ ।