एमसीसीलाई संसदबाट अनुमोदन गर्ने वा नगर्ने नेपालकै अधिकारः चिनियाँ राजदूत
काठमाडौँ । नेपालका लागि चिनियाँ राजदूत होउ यान्छीले मिलेनियम च्यालेन्ज कम्प्याक्ट (एमसीसी) नेपालको संसदबाट अनुमोदन गर्ने नगर्ने कुरा नेपालको भएको बताएकी छन् ।
शुक्रबार काठमाडौंस्थित दूतावासमा आयोजित पत्रकार सम्मेलनमा राजदूत यान्छीले नेपालले अन्य मुलुकबाट पनि आर्थिक विकासका लागि सहयोग लिन सक्ने उल्लेख गर्दै एमसीसीलाई संसदबाट अनुमोदन गर्ने वा नगर्ने नेपालकै अधिकार भएको बताइन् ।
उनले भनिन्, ’यो नेपालकै अधिकारको कुरा हो, कुनै एउटा देशसँग मात्रै सहयोग लिएर नेपाललाई पुग्दैन ।’ पत्रकार सम्मेलनमा उनले टु प्लस वान (चीन–भारत प्लस नेपाल) भनेको त्रिदेशीय नै रहेको र सबैको समान हैसियत हुने बताइन् ।
पत्रकार सम्मेलनमा राजदुत होउले यो अवधारणा कसैलाई ‘डिक्टेट’ नगर्न भएको दाबी गरिन् । नेपालमा केही समयअघि अपराधको आरोपमा समातिएका चिनियाँहरूबारे चीनले नेपाल सरकारलाई सुचना दिएको बताइन्।
गलत काम गर्ने चिनियाँ नागरिकलाई आफ्नो मुलुकले कतै पनि संरक्षण नगर्ने र राम्रो काम गर्नेलाई सधै संरक्षण गर्ने उनको भनाई थियो ।
