‘नेपाल विशेष सेवा विधेयक राणा शासनको झल्को’
काठमाडौं । राष्ट्रियसभाका नेपाली कांग्रेसका सांसद राधेशयाम अधिकारीले सरकार निरंकुशतातर्फ अघि बढेको आरोप लगाएका छन् ।
राष्ट्रियसभा बैठकमा पेश भएको ‘नेपाल विशेष सेवा विधेयक २०७६’ माथि बुधबार आफ्ना धारणा राख्दै अधिकारीले राणा शासनमा सरकारको विरुद्ध कुरा गर्न डराउनुपर्ने अवस्था रहेकोमा अहिलेको सरकारले आफ्नो त्यही डर उत्पन्न गराउने अवस्था सिर्जना गरेको आरोप लगाएका हुन् । उनले भने, ‘राणा शासनलाई हामीले के भनेर बुझ्छौ ? त्यसलाई हामी निरङ्कुस शासन भनेर बुझ्छौँ । त्यो बेला सरकारको विरुद्ध केही कुरा हुँदा भित्ताको पनि कान हुन्छ भन्ने डर हुन गर्दथ्यो भनेर बुढापाखाले भन्थे ।’
विधेयकले सोझै स्वतन्त्रता, मौलिक हक, सूचनाको हक र प्रेसको हकमाथि हमला गरेको उनको भनाई थियो । उनले विधेयक एउटले ल्याउने र उपभोग अर्कोले गर्नेतर्फ पनि सरकारको ध्यानाकर्षण गराए ।
यस्तै राष्ट्रियसभा सदस्य धनकुमारी खतिवडाले देशले काँचुली फेर्नुपर्ने अवस्थामा मौलिक हक, स्वतन्त्रता, सुचना र गोपनियताको हकमाथि हमला गर्दै सरकार निरङ्कुसता र तानासाही बन्न खोजेको आरोप लगाइन् । उनले विरोधी र विरोधी प्रतिस्पर्धीलाई फसाउने षड्यन्त्र सरकारले गरेको बताइन् ।