गोकर्ण रिसोर्ट र नारायणहिटीको जग्गा लिजको विषय सदनलाई जानकारी गराउन सत्तारुढकै सांसदको माग
काठमाडौं । सत्तारुढ नेकपाका सांसद खिमलाल भट्टराईले गोकर्ण रिसोर्ट र नारायणीहिटी जग्गामा देखिएको विवाद बारे स्पष्ट पार्न सरकारसंग माग गरेका छन् ।
राष्ट्रियसभाको सोमबारको बैठकमा बोल्दै भट्टराईले सार्वजनिक जग्गाको संरक्षणमा सक्रिय रुपमा लागेको सरकारले यी दुई जग्गाको बारेमा उत्पन्न विवादलाई सम्बोधन गर्नुपर्ने बताएका हुन् ।
उनले भने, “खास गरी गोकर्ण रिसोर्ट र नारायणहिटी संग्रहालय अगाडि दरबारमार्गमा रहेको जग्गाको भोगाधिकार सम्बन्धी विषय आलोचनाको रुपमा बाहिर आएको छ । आलोचना र विवाद बाहिर आईसकेपछि स्पष्ट पार्नु सरकारको कर्तव्य हुन्छ । तसर्थ यी विषयमा सदनलाई जानकारी गराईयोस् । ”
विगतमा पनि राजनीतिक मुद्दाको रुपमा लिपुलेक र लिम्पियाधुराको विषय धेरै उठ्ने गरेको भन्दै उनले सीमाको विषयमा स्पष्ट अडान लिएको भन्दै सरकारको बचाउ गरे ।