नेकपाको स्थायी कमिटी बैठकः प्रचण्डको राजनीतिक प्रतिवेदनमाथि सोमबारदेखि छलफल हुने
काठमाडौं । सत्तारूढ नेपाल कम्युनिष्ट पार्टीको स्थायी कमिटी बैठकमा अध्यक्ष पुष्पकमल दाहाल प्रचण्डले राजनीतिक प्रतिवेदन पेश गरेका छन् । अध्यक्ष प्रचण्डले वर्तमान परिस्थिति, राजनीतिक घटनाक्रम, पार्टीको आगामी नीतिलगायत विषय समेटिएको प्रतिवेदन १७ पुष्ठ लामो प्रतिवेदन बैठकमा पेश गरेका हुन् । प्रतिवेदनमाथि सोमबारदेखि छलफल हुनेछ ।
आइतबारको बैठक करिब दुई घण्टा चलेर स्थगित भएको छ । बैठकमा महासचिव विष्णु पौडेलले विधान संशोधन प्रस्ताव पनि पेश गरेका छन् ।
प्रतिवेदनमा प्रचण्डले पार्टीको बैठक समयमा गर्न नसकेकोमा आत्मालोचना गर्दै अब यस्तो नगर्ने प्रतिवद्धता जनाएका एक सदस्यले जानकारी दिएका छन् । बैठकमा पार्टी अध्यक्षसमेत रहेका प्रधानमन्त्री केपी शर्मा ओली भने स्वास्थ्यका कारण उपस्थित भएका थिएनन् ।
यसअघि आइतबारै विहान बसेको सचिवालय बैठकले स्थायी कमिटी बैठकका लागि पाँच एजेन्डा तय गरेको थियो । राजनीतिक प्रतिवेदन पेश, केन्द्रीय कमिटी बैठक बोलाउने, नेपाल भारत सीमा विवाद, विधान संशोधन र अन्य एजेन्डा छलफलका लागि तय गरेको थियो । नेकपाको स्थायी कमिटीको बैठक एकवर्ष पछि बसेको हो । नेकपाको स्थायी कमिटी ४५ सदस्यीय छ ।
