बम विष्फोटमा परी धनुषामा प्रहरी निरीक्षकसहित तीन जनाको मृत्यु, दुई घाइते
जनकपुरधाम । धनुषाको थिरेश्वरनाथ नगरपालिका वडा नम्बर पाँचस्थित औषधि व्यवसायी राजेश साहको घरमा बम विस्फोट हुँदा तीनजनाको मृत्यु भएको छ भने दुईजना घाइते भएका छन् ।
शुक्रबार मध्यराति भएको विस्फोटमा एकजना प्रहरी निरीक्षकसहित तीनजनाको मृत्यु भएको हो । मृत्यु हुनेमा इलाका प्रहरी कार्यालय महेन्द्रनगरका इन्चार्ज प्रहरी निरीक्षक अमिर दाहाल, औषधी व्यवसायी राजेश साह र उनका छोरा रहेका छन् ।
विस्फोटमा गम्भीर घाइते भएका प्रहरी दाहालको उपचारका क्रममा शनिबार बिहान मृत्यु भएको प्रहरी नायब उपरीक्षक रामेश्वर कार्कीले जानकारी दिएका छन् । राजेश साहले आफ्नो घरमा बम राखेको थाहा पाएपछि प्रहरी निरीक्षक दाहाललाई बोलाएका थिए ।
विस्फोटमा परि राजेश साहका एक छोरा र एक छोरी घाइते भएका छन् । बम कसले र किन राख्यो भन्ने विषय पत्ता लाग्न सकेको छैन ।