‘सगरमाथा संवाद सचिवालय’ स्थापना
काठमाडौं । सरकारले ‘सगरमाथा संवाद’ कार्यक्रम संचालनका लागि ‘सगरमाथा संवाद सचिवालय’ स्थापना गरेको छ । कार्यक्रमलाई सफल बनाउन परराष्ट्रमन्त्री प्रदीप ज्ञवालीको अध्यक्षतामा २० सदस्यीय आयोजक समिति पनि गठन गरिएको परराष्ट्र मन्त्रालयले जनाएको छ । आगामी चैत्रको तेस्रो साता नेपालमा पहिलो पटक अन्तराष्ट्रिय स्तरको ‘सगरमाथा संवाद’ कार्यक्रम आयोजना हुँदैछ ।
‘जलवायु परिवर्तन, पर्वतीय वातावरण र मानव जातिको भविष्य’ विषयक शीर्षकमा नेपालमा पहिलो पटक आगामी चैत्र २०, २१ र २२ गते सो अन्तराष्ट्रिय स्तरको सगरमाथा संवाद कार्यक्रम आयोजना गर्न लागिएको हो ।
बुधबार काठमाडौंमा पत्रकार सम्मेलन गरी परराष्ट्रमन्त्री ज्ञवालीले कार्यक्रमबारे औपचारिक जानकारी दिँदै विश्वका उच्च राजनीतिक नेतृत्व, मुलुक र विज्ञहरुबीच जलवायु परिवर्तनको संकट समाधानका लागि यो अन्तरगत संवाद कार्यक्रम गर्न लागिएको स्पष्ट पारे ।
संवाद कार्यक्रमले जलवायु परिवर्तनको असर न्यूनिकरणका लागि विश्वका विभिन्न मुलुकबीच समान धारणा बनाउन सहयोग पुग्ने सरकारले अपेक्षा लिएको मन्त्री ज्ञवालीले बताए ।
