सार्वजनिक बसमा भ्रमण वर्षको लोगो टाँसिने
काठमाडौं । नेपाल भ्रमण वर्ष २०२० को प्रचारका लागि सार्वजनिक बसमा भ्रमण वर्षको लोगो टाँसिने भएको छ । बिहीबार एक कार्यक्रमका बीच संस्कृति, पर्यटन तथा नागरिक उडड्यन मन्त्री योगेश भटराईले भ्रमण वर्षको स्टिकर र लोगो यातायात व्यवसायीलाई हस्तान्तरण गरेका हुन् ।
लोगो वितरण गर्दै मन्त्री भट्टराईले उपत्यकाभित्रका एक हजार सवारी चालक र सहचालकहरुलाई भ्रमण वर्षबारे तालिमको व्यवस्था गरिने बताए ।
उनका अनुसार सार्वजनिक यातायातका यात्रु, चालक तथा सहचालकलाई सरसफाईमा चेतना जगाउन एक सय जना स्वयमसेवक समेत परिचालन गरिनेछ ।
त्यस कामको समन्वय पर्यटन मन्त्रालय, भ्रमण वर्ष सचिवालय, पर्यटन बोर्ड, स्थानीय तह, यातायात व्यवसायी राष्ट्रिय महासंघ, ट्रेड युनियन र ट्राफिक प्रहरीले गर्नेछन् । नेपालभर करिब तीन लाखको संख्यामा सार्वजनिक बस सञ्चालित छन् ।
