युवतीको बलात्कारपछि हत्या गरी अमेरिका फरार भएका लिलाराज गौतमलाई नेपाल ल्याइयो
काठमाडौं । बलात्कारपछि हत्या गरेर अमेरिका फरार भएका एक नेपाली अभियुक्त अमेरिकामा १९ वर्षपछि पक्राउ परेका छन् । झापा चन्द्रगढी–३ घर भई हाल अमेरिकामा बस्दै आएका लिलाराज गौतमलाई अमेरिकी प्रहरीले पक्राउ गरेर नेपाल प्रहरीलाई बुझाएको हो ।
लिलाराज विरुद्ध २०७४ मंसिरमा रेड नोटिस जारी भएको थियो । गौतमलाई बुधबार टर्किस एयरलाइन्सबाट काठमाडौं ल्याइएको छ । उनी सन् २०१८ फ्रेबुअरी ३ मा अमेरिकामा पक्राउ परेका थिए ।
२०५७ साल असोज २९ गते गौतमसहित मनोज खड्का र सीताराम खड्काले चन्द्रगढी–३ की एक युवतीको सामूहिक बलात्कारपछि हत्या गरेको आरोप छ । सर्वोच्च अदालतले ०६६ भदौ १९ गते उनीहरुलाई जन्मकैदको सजाय सुनाएको थियो ।
गौतमलाई आवश्यक कारवाहीको लागि केन्द्रीय अनुसन्धान व्युरो (सिआईबी)को जिम्मा लगाइएको छ ।