गैरआवासीय नेपालीलाई जन्मभूमिमा लगानी गर्न राष्ट्रपतिको आग्रह
काठमाडौं । राष्ट्रपति विद्यादेवी भण्डारीले गैरआवासीय नेपालीहरूलाई जन्मभूमिमा लगानी गर्न आग्रह गरेकी छन् ।
गैरआवासीय नेपाली संघ एनआरएनएको नवौं सम्मेलनको मंगलबार उद्घाटन गर्दै राष्ट्रपति भण्डारीले लगानीका लागि आन्तरिक र बाहृय दुवै ढंगले अनुकूल वातावरण सिर्जना भइसकेको भन्दै लगानीका लागि आग्रह गरेकी हुन् ।
गैरआवासीय नेपालीहरूले विदेशमा सिकेका सीपलाई नेपालको विकास र समृद्धिमा प्रयोग गर्न पनि उनले आग्रह गरिन् । लगानी सुरक्षाका लागि सरकारले विभिन्न नीतिगत व्यवस्था गरेको राष्ट्रपतिको भनाइ थियो ।
बिहीबारसम्म चल्ने सम्मेलनमा सहभागी हुन ८१ देशबाट एनआरएनएका प्रतिनिधि काठमाडौं आइपुगेका छन् । सम्मेलनले अध्यक्षसहित १२ पदमा ४२ जनालाई चुन्नेछ । अध्यक्षमा वामपन्थीबाट कुमार पन्त र प्रजातान्त्रिक समूहबाट कुल आचार्य मैदानमा छन् ।
