विकास गरेर नै जनताको मन जित्न प्रचण्डलाई चिनियाँ विदेश विभाग प्रमुख ताओको सुझाव
काठमाडौं । नेपाल कम्युनिष्ट पार्टी (नेकपा) का अध्यक्ष प्रचण्डसँग चिनियाँ विदेश विभाग प्रमुख सोङ ताओले भेटवार्ता गरेका छन् ।
राजधानीस्थित होटल मेरिओटमा मंगलबार बिहान भएको भेटमा दुबै देशका कम्युनिष्ट पार्टीका गतिविधि बारे कुराकानी भएको थियो ।
अध्यक्ष प्रचण्डले चिनियाँ कम्युनिष्ट पार्टीले नेपाल र नेपाली जनतामा गरेको सहयोग र सद्भावले नेपाल राम्रो प्रभाव परेको बताए ।
उनले दुई कम्युनिष्ट पार्टी बीचको आपसी सम्बन्धलाई नयाँ स्तरमा विकास गर्ने र एकअर्काका अनुभवहरु साटासाट गरेर अगाडि बढ्ने बताए । उनले भने, ‘नेपालको समृद्धिमा चिनियाँ सरकार र कम्युनिष्टको सहयोग आगामि दिनमा अझ बढ्ने मैले विश्वास लिएको छु ।’
विदेश विभाग प्रमुख ताओले दुबै पार्टीका अनुभव साटासाट गर्ने कार्यक्रम बनाउनुपर्नेमा जोड दिए । कम्युनिष्ट पार्टीका लागि सिद्धान्त ठूलो कुरा भएको बताउँदै यसलाई अझै मजबुत बनाउनुपर्ने औल्याउनु पर्नेमा उनको जोड थियो । ‘देशको आर्थिक विकास मुख्य कुरा हो, विकास गरेर नै जनताको मन जित्न सकिन्छ, ’ ताओको भनाई थियो ।
