भारतमा कोरोना संक्रमितको संख्या १० लाख नाघ्यो, २५ हजार भन्दा बढीको मृत्यु
छिमेकी मुलुक भारतमा कोरोना सङ्क्रमितको सङ्ख्या १० लाख नाघेको छ । भारतमा कोरोना सङ्क्रमितको सङ्ख्या १० लाख पाँच हजार ६ सय ३७ पुगेको वल्डोमिटरले जनाएको छ । संक्रमण तीव्र रुपमा बढिरहेको भारतमा पछिल्लो २४ घण्टामा ३५ हजारभन्दा बढी मानिस संक्रमित भएका छन्। यो एकै दिनमा धेरै संक्रमित हुने नयाँ रेकर्ड हो ।
संक्रमितमध्ये ६ लाख ३६ हजार ६ सय २ जना निको भएका छन् । ३ लाख ४३ हजार ४ सय २६ जनाको उपचार भइरहेको छ । यस्तै २५ हजार ६ सय ९ जनाले भारतमा कोरोना सङ्क्रमणका कारण ज्यान गुमाएका छन् । विश्वमा सबैभन्दा बढी सङ्क्रमित भएका देशमध्ये अमेरिका र ब्राजिलपछि भारत तेस्रो स्थानमा पुगेको छ ।
भारतमा दैनिक ३० हजारभन्दा बढी मानिसमा कोरोना सङ्क्रमणको पुष्टि हुने गरेको छ । सङक्रमितको सङ्ख्या बढेसँगै निको हुने दर पनि बढिरहेको छ । भारतमा कूल सङ्क्रमितमध्ये ६३ प्रतिशत बिरामी निको भएका छन् ।
