रक्षक र संहारक दुबै शक्ति भएका सरकारहरू
जेपी गुप्ता ।
दलहरू समर्थन खोज्छन्,संसदमा अत्यधिक शक्ति । जनता त्यस आग्रहमा सम्मुन्नति र विकासको शक्ति देख्छन् । फलतः निर्वाचनहरूले असीम शक्तिको सरकार दिन्छ । उद्दारक सरकारहरूको चरित्र फेरिन कति बेर लाग्छ र ? फलतःअमुक अमुक मुलुकहरूको सरकार हसिनाको, मोदीको, पुटिनको, ओलीको सरकारमा रूपान्तरित हुन जान्छ । आत्म श्लाघामा मदमस्त सरकारहरू ! रक्षक र संहारक दुबै शक्ति भएका सरकारहरू ।
भारतको उत्तर प्रदेशको उदाहरण हेरौं । यता तीन बर्ष भित्र उत्तर प्रदेशमा पुलिसले इन्काउन्टरमा ११९ जना कथित अपराधीको हत्या गरेको छ । हरेक घटना विवादस्पद देखियो । छानबिनमा यस मध्ये ७४ वटामा पुलिसले उन्मुक्ति पाएका छन् । अर्थात्, हत्याको परिस्थिति रहेको भन्यो । यस मध्ये अधिकांश गैरन्यायिक हत्यालाई जनताले पनि ठिक भन्यो । यसमा जनताले छरितो न्याय देख्यो । हत्याको बदला हत्या ।
यस कुराको हेक्का राखिएन कि लोकतन्त्रमा अत्यधिक शक्तिको बलियो सरकार बन्दा सरकार मात्र बलियो हुन्छ, लोकतन्त्र सधै न्यायका लागि विनित रहन्छ । अनि अदालत दिग्दर्शक मात्र रहन जान्छ । शक्ति पृथकीकरण सजावटको बिषय मात्र रहन जान्छ ।
भारतमा झांगिएको यो छरितो न्यायको व्यवस्था यता हामी कहाँ पनि जरो जमाउँदै छ । यस बारेमा उठेका स साना प्रश्नहरू बिलाएर जाँदैछ । भारतमा त भैरहेको छ नि भनेर !
