अब सबै प्रदेशमा हरेक दिन पीसीआर विधिबाट एक हजारसम्म परीक्षण गर्ने सरकारको तयारी
काठमाडौं । स्वास्थ्य तथा जनसंख्या मन्त्री भानुभक्त ढकालले असार १५ गतेसम्म हरेक दिन १० हजारका दरले पीसीआर परीक्षणको दायरा बढाउने जानकारी दिएका छन् । शनिबार स्वास्थ्य मन्त्रालयमा पत्रकारहरुसँगको अन्तक्र्रियामा स्वास्थ्य मन्त्री ढकालले निजी क्षेत्रको सहयोगमा १० हजार परीक्षण गरिने जानकारी दिएका हुन् ।
मन्त्री ढकालले प्रत्येक प्रदेशमा हरेक दिन १ हजारसम्म परीक्षण गर्ने गरी स्तरवृद्धि गरिने पनि बताए । उनले कोरोना परीक्षणमा पहुँच नभइ आवश्यक सबैको परीक्षण गरिएको जानकारी दिए । उनले कोरोना संक्रमित बढ्दै गएको अवस्थामा लक्षण नदेखिएका विरामीलाई आइससोलेसनमा र गम्भीर रुपका विरामीलाई मात्र अस्पतालमा राखिने तयारी भएको जानकारी दिए ।
राज्यले कोरोना संक्रमणसंग लड्न सबै तयारी गरेको उनको भनाई थियो । मन्त्री ढकालले कोरोना नियन्त्रणका लागि आवश्यक सामाग्रीहरु ल्याउने क्रम जारी नै रहेको भन्दै स्वास्थ्य सामग्री खरिदमा कुनै अनियमितता नभएको दाबी गरे । मन्त्री ढकालले भारतबाट एकैपटक धेरै व्यक्ति भित्रदा जाँचमा केहि ढिलाई भएको पनि बताए ।
