बागलुङकी १९ वर्षीया युवती कोरोनालाई जितेर अस्पतालबाट डिस्चार्ज
काठमाडौं । नेपालकी पाँचौ कोरोना संक्रमित बागलुङकी निको भइ शुक्रबार राति १० बजे अस्पतालबाट डिस्चार्ज भएकी छन् । धौलागिरी अञ्चल अस्पतालको आईसोलेसनमा उपचाररत १९ वर्षीया युवती कोरोना भाइरस मुक्त भई अस्पतालबाट डिस्चार्ज भएकी हुन् ।
छैठौं पटक गरिएको थ्रोट स्वाव परीक्षणको नतिजा नेगेटिभ आएपछि उनलाई डिस्चार्ज गरिएको अस्पतालले जनाएको छ । चैत ४ गते बेल्जियमबाट कतारको दोहा हुँदै नेपाल आएकी उनलाई चैत १५ गते कोरोना संक्रमण रहेको पुष्टि भएको थियो । उनी अस्पतालबाट डिस्चार्ज भएपछि पनि २ हप्ता होम क्वारेन्टाइनमै बस्नुपर्ने अस्पतालले जनाएको छ ।
यसअघि ती युवतीसँगै बेल्जियमबाट आएकी बागलुङ नगरपालिका–३ गौडाकोटकी ६५ बर्षीया मनकुमारी पौडेल कोरोनालाई जितेर ६ बैशाखमा घर फर्किएकी थिइन् । नेपालमा शुक्रबारसम्म कोरोना संक्रमितको संख्या ४९ पुगेको छ । जसमध्ये ११ जना कोरोनालाई जितेर घर फर्किएका छन् ।
फोटोः गणेश पौडेल
