कोरोना भए नभएको पुनः पुष्टि गर्न बीपी प्रतिष्ठान र भेरी अस्पताल पनि तोकिए
काठमाडौं । पीसीआर मेसिनबाट परीक्षण गर्दा कोरोना भाइरस संक्रमण देखिएका नमुनाको पुष्टि गर्न थप दुई स्थान तोकेको स्वास्थ्य तथा जनसंख्या मन्त्रालयले जनाएको छ । पीसीआर मेसिनमा कोरोना परीक्षण गर्दा संक्रमण देखिएमा पूर्वको बीपी कोइराला स्वास्थ्य विज्ञान प्रतिष्ठान धरान र पश्चिमको नेपालगञ्जस्थित भेरी अस्पतालको प्रयोगशालाले एकीन गर्ने मन्त्रालयले आइतबार गरेको पत्रकार मन्त्रालयका प्रवक्ता डा. विकास देवकोटाले जानकारी दिए ।
यसअघि आरडीटी परीक्षणमा कोरोना पोजेटिभ देखिँदा पुनः पीसीआरमा परीक्षण गर्दा समेत पोजेटिभ देखिएमा थप एकीन गर्न राष्ट्रिय जनस्वास्थ्य प्रयोगशालामा ल्याउने गरिएको थियो । त्यस्तै कोरोना संक्रमण भएर सेती प्रादेशिक अस्पतालमा उपचारार्थ भर्ना भएका २१ वर्षीय युवक निको भएका मन्त्रालयका प्रवक्ता डा. देवकोटाले बताए ।
नेपालमा अहिलेसम्म ३१ जनामा कोरोना संक्रमण देखिएको छ । शनिबार उदयपुरमा थप एकजना ६५ वर्षीय पुरुषमा कोरोना संक्रमण पुष्टि भएको थियो ।
