अहिले देशलाई महामारीबाट बचाऔं, बाँकी बहस पछि गरौंलाः स्वास्थ्यमन्त्री ढकाल
काठमाडौं । स्वास्थ्य तथा जनसंख्यामन्त्री भानुभक्त ढकालले अहिले देशलाई महामारीबाट बचाउनु प्रमुख दायित्व भएको बताएका छन् । सोमबार नयाँ वर्ष २०७७ को अवसरमा शुभकामना सन्देश दिँदै मन्त्री ढकालले देशलाई महामारीबाट बचाउनुपर्ने र बाँकी बहस पछि गर्न उचित हुने बताएका हुन् ।
उनले महामारीविरुद्धको लडाई सबै एकजुट भएर मात्र लड्न सकिने बताए । महामारीका बेलामा जनताको स्वास्थ्य र सुरक्षाको ग्यारेन्टी गर्नु नै प्रमुख दायित्व हुने मन्त्री ढकालको भनाइ थियो । कोरोना भाइरसको महामारीविरुद्ध अग्रपंक्तिमा रहने चिकित्सक र स्वास्थ्यकर्मीको स्वास्थ्य सुरक्षाको प्रत्याभूति सरकारले गर्ने उनले बताए ।
मन्त्री ढकालले अहिले कोरोना भाइरसको उपचारका लागि आवश्यक स्वास्थ्य सामग्रीको विश्वव्यापी अभाव रहेकाले आफूसँग भएका साधनको दुरुपयोग नगरी अधिकतम सदुपयोग गर्न आग्रह गरे ।
