प्रधानमन्त्रीलाई गगन थापाको खुला पत्रः कोरोना भाइरस परीक्षणको दायरा बढाउन आग्रह
काठमाडौं । कांग्रेस नेता एवं पूर्वस्वास्थ्यमन्त्री गगन थापाले प्रधानमन्त्री केपी शर्मा ओलीलाई खुला पत्र लेख्दै कोरोना भाइरस परीक्षणको दायरा बढाउन आग्रह गरेका छन् । थापाले सामाजिक संजाल फेसबुक र ट्वीटरमार्फत प्रधानमन्त्रीलाई खुला पत्र लखेको हुन् ।
पत्रमा उनले एक साताको लकडाउनको सदुपयोग गर्दै हजारौंमा कोरोना परीक्षण गर्न आग्रह गरेका छन् । यसका लागि हाल राष्ट्रिय जनस्वास्थ्य प्रयोगशालाको क्षमताको पूर्ण सदुपयोग गर्नुपर्ने भन्दै धरान, पोखरा र नेपालगञ्जमा पनि परीक्षण गर्ने उच्चस्तरीय समन्वय समितिको निर्णय तत्काल कार्यान्वयन गर्नुपर्नेमा जोड दिएका छन् । यो पनि पर्याप्त नहुने भन्दै उनले भनेका छन्, ‘कम्तीमा हरेक प्रदेशमा तत्काल परीक्षण सुरु गर्नुपर्छ ।’
