ह्वाइटहाउसमा नमस्कार
एकअर्कालाई भेट्दा नमस्कार गरी अभिवादन गर्ने हामी नेपालीहरुको पुरानो चलन हो । तर पछिल्लो समय साथी भाइ भेट्दा हात उठाउने र हात मिलाउने प्रचलन बढी छ । अझ पश्चिमाहरु त एकअर्कालाई भेट्दा अँगालो हालेर गाला जोड्ने गर्छन् । तर संसारभर कोरोना भाइरसको सक्रमण फैलिएपछि अहिले नमस्कार गरी साथीभाइलाई स्वागत गर्ने प्रचलन विश्वमै सुरु भएको छ ।
अमेरिकी राष्ट्रपति डोनाल्ड ट्रम्प र आयरल्यान्डका प्रधानमन्त्री लिओ भरदकरले एकअर्कालाई नमस्कार गरी अभिवादन गरेको तस्वीर सार्वजनिक भएको छ । बिहीबार राष्ट्रपति ट्रम्पको ओभल अफिसमा भएको भेटघाटमा उनीहरूले एक अर्कासँग हात मिलाउनुको साटो नमस्कार गरेका हुन् । ट्रम्प नमस्कार गर्ने चलन भारत भ्रमणबाट सिकेको बताएका छन् ।
त्यसैगरी बेलायती राजकुमार चाल्र्सले पनि एक कार्यक्रममा सहभागी हुने क्रममा सबैसँग नमस्कार गरी अभिवादन गरेका छन् । कोरोनाको संक्रमणका कारण नमस्कार अब विश्वव्यापी बन्दै गएको छ ।
