‘दुई तिहाइको दम्भ देखियो, न्यायको घाँटी रेटियो’ भन्दै तरुण दलको प्रदर्शन
काठमडौं । नेपाल तरुण दलले ललिता निवास प्रकरणमा कांग्रेस उपसभापति विजयकुमार गच्छदारलाई राजनीतिक पूर्वाग्रहका आधारमा अख्तियार दुरुपयोग अनुसन्धान आयोगले भ्रष्टाचारको मुद्दा चलाएको भन्दै आइतबार माइतीघर मण्डलामा विरोध प्रदर्शन गरेको छ ।
नेकपाका वरिष्ठ नेता माधव कुमार नेपाल र महासचिव विष्णु पौडेललाई उन्मुक्ति दिएर पार्टी उपसभापति गच्छादारमाथि भ्रष्टाचारको मुद्दा दायर गरेको भन्दै तरुण दलले विरोध प्रदर्शन गरेको हो ।
प्रदर्शनमा तरुण दलका नेता कार्यकर्ताले दुई तिहाइको दम्भ देखियो, न्यायको घाँटी रेटियो, नेपाल पौडेल ओलीका यार, गच्छदार फसाउन लाग्यो अख्तियार जस्ता नारा लगाएका थिए । यसअघि शुक्रबार नेविसंघले पनि अख्तियारको निर्णयको विरोध गर्दै प्रदर्शन गरेको थियो । यता माउपार्टी नेपाली कांग्रसले आइतबार तेस्रो दिन पनि संसद अवरुद्ध गरेको छ ।