किन गर्ने गाँजा खेती ?
नारायण गाउँले ।
‘गाँजा’ खेती खुला हुनुपर्छ भन्ने धेरैले यसको गुण र उदाहरणचाहिँ ‘हेम्प’ को दिएको देखेको छु । गाँजा (marijuana) र औद्योगिक रूपमा प्रयोग हुने हेम्प (Hemp) एउटै होइनन् ।
गाँजाकै प्रजातिको तर ‘नन-साइकोएक्टिभ’ वनस्पति हो हेम्प । बिरालो र बाघजस्तै । यसको धेरै देशमा व्यावसायिक उत्पादन हुन्छ । खाद्य सामग्रीदेखि, औषधि, टेक्स्टाइल, सौन्दर्य प्रशाधन र फ्यूलसम्म यसको प्रयोग हुन्छ ।
दिमाग लठ्याउने बाहेक अन्य औषधीय र खाद्य गुण यसमा हुने रहेछ । यसको व्यापार अहिले पनि गर्न सकिन्छ । हामीले गाँजा खुला हुनुपर्छ भनेर जुन प्लेन उडेको देखि औषधिको बट्टासम्म देखाएर प्रचार गरिरहेछौं त्यो बास्तवमा ‘असली’ गाँजा नभएर हेम्पकै हो ।
हामीलाई युवा पुस्तालाई गाँजा पिलाएर लठ्याउन पक्कै गाँजाखेती चाहिएको होइन । औषधि, कपड़ा, खाद्यसामग्री या अन्य व्यावसायिक उद्देश्यका लागि ‘लागू पदार्थ’ शून्य या अतिकम भएको खाले गाँजा (हेम्प)लाई खुला र प्रबर्धन गर्न सकिन्छ । यसले गर्दा सर्प पनि मर्ने र लठ्ठी पनि नभाँचिने हुन्छ । तर, त्यसको अनुगमनका लागि साधनस्रोत र जनशक्ति धेरै नै चाहिने हुनाले अन्य व्यवसायिक खेती पो गाँजा भन्दा राम्रो हुन्छ कि ?