कसैले पनि आफ्नो धरातल विर्सन हुँदैनः शिवमाया तुम्बाहाङ्फे
काठमाडौं । उपसभामुख शिवमाया तुम्बाहाङ्फेले संविधानको मर्म अनुसार नै आफूले सभामुखका पदका लागि दाबी गरेको र त्यसबारे शीर्ष तहमा कुरा राखेको र त्यो अस्वभाविक नभएको बताएकी छन् ।
सोमबार प्रतिनिधिसभाको पहिलो बैठकलाई सम्बोधन गर्दै तुम्बाहाङ्फेले आफ्ना धारणाहरु सम्बन्धित निकायमा प्रस्तुत गरेकी बताएकी हुन् । उनले भनिन्, ‘मेरा धारणाहरु संम्बन्धित निकायमा प्रस्तुत गरेकी हुँ । मेरा यी धारणाहरु कुनै अस्वभाविक महत्वकाक्षा या र अनुचित आग्रहबाट प्रेरित थिएनन् भन्ने कुरामा म दृढ छु । यस सम्बन्धि विभिन्न प्रतिक्रियाहरु मैले नजिकबाट नियालिरहेकी छु । समयले यसबारेमा बस्तुनिष्ठ मुल्यांकन गर्नेछ भन्ने मेरो विश्वास छ । ”
अन्यौलपूर्ण अवस्थामा उपसभामुख पद रिक्त गरेर नहुने भएकाले आफूले भने अनुसार नै मार्गप्रसस्त गर्न लागेको उनले उल्लेख गरिन् । “एउटा अप्रत्यासित र अस्वभाविक परिस्थितिका कारण विगत केही समय देखि प्रतिनिधिसभाको सभामुख पद रिक्त रहदै आएको व्यहोरा यहाँहरुलाई अवगत नै छ । सार्वभौम संसदको महत्वपुर्ण अंग प्रतिनिधिसभा लामो समय सभामुख विहिन हुदा उत्पन्न जटिलता र यसले श्रृजना गरेका समस्याका बारेमा पनि हामी सबै जानकार नै छौ । यस्तो स्थिति अव कायम रहनु हुदैन ।सभामुख चयनको ठोस आधार तय भएपछि आफुले मार्गप्रसस्त गर्ने भनेर आफुले राख्दै आएका मान्यता संमानित सदन समक्ष अभिलेखित गराउन चाहन्छु । ”
उनले संविधानमा लेखिएका कुरालाई व्यवहारमा उतार्ने काम नभएको प्रति गुनासो गरिन् । आफूले इमान्दारितापूर्वक कर्तव्य पूरा गर्ने प्रयास गरेको भन्दै उनले कसैले पनि आफ्नो धरातल विर्सन नहुने बताइन् ।
