अब सवारी चलाउँदा चालकले अनिवार्य जुत्ता लगाउनुपर्ने
काठमाडौं । अब सार्वजनिक सवारी साधन चलाउने चालकले सवारी गुडाउँदा मोबाइल चलाउन नपाउने भएका छन् । महानगरीय ट्राफिक महाशाखाले मोबाइल चलाउन नपाउने र सवारी चलाउँदा जुत्ता लगाउनुपर्ने निर्णय गरेको हो ।
सरोकारवाला निकायसँगको छलफलमा सार्वजनिक यातायत सुधारका लागि विभिन्न १९ वटा बुँदा लागू गर्ने निर्णय भएको महाशाखाका एसएसपी भीम ढकालले जानकारी दिए । महाशाखाका अनुसार सरोकारवाला निकायबीच तोकिएको भाडादर मात्रै लिने, ढोका खुला गरी नचलाउने, आरक्षण सिटको पालना गर्ने, गाडीको रंगरोगन दुरुस्त राख्ने, क्षमताभन्दा बढी यात्रु नबोक्ने सहमति भएको छ ।
यस्तै यात्रुलाई चालक÷सहचालकले राम्रो व्यवहार गर्ने, चालकले यात्रुसँग अनावश्यक गफ नगर्ने, सवारीसाधनको सरसफाई गर्ने, सवारीमा स्टिकर र झल्लर लगाउन नपाइने सहमति भएको छ । महाशाखाका एसएसपी ढकालले चालक मोबाइल गफिँदा र जुत्ता नलाउँदा खुट्टा चिप्लिएर दुर्घटना हुने सम्भावना रहेको बताए ।
