एक सय जना यात्रु सवार बेक एयरको विमान कजाकस्तानमा दुर्घटनाग्रस्त, कम्तीमा १४ जनाको मृत्यु
कजाखस्तानमा १०० जना यात्रु चढेको एउटा विमान दुर्घटनाग्रस्त भएको विमानस्थलका अधिकारीहरूले बताएका छन्।
उनीहरूका अनुसार बेक एअरको उक्त विमान शुक्रवार बिहान अल्माटी विमानस्थलबाट उडेको केही बेरमै तल खसेको थियो।
आपत्कालीन सेवाका कर्मचारीहरूलाई दुर्घटनास्थलमा पठाइएको छ। कम्तीमा १४ जनाको ज्यान गएको पुष्टि गरिएको छ। कम्तीमा ६० जना मानिसहरूलाई जीवितै उद्धार गरी अस्पताल लगिएको छ।
उक्त विमान देशको सबैभन्दा ठूलो सहर अल्माटीबाट राजधानी नुरसुल्तानका लागि उडेको थियो। अल्माटी विमानस्थलका अनुसार विमानमा ९५ जना यात्रु र पाँच चालक दलका सदस्य थिए।
विमान कङ्क्रिटको एउटा संरचनामा ठोकिएपछि एउटा दुईतले भवनमा जोतिएको बताइएको छ। उद्धारकर्मीहरू दुर्घटनास्थलमा पुगेको भिडिओ सार्वजनिक भएको छ।
