प्रहरी भन्छ -एकल महिला र युवा चिनियाँ नागरिकको ठगीको निशाना
काठमाडौं । नेपाल प्रहरीको केन्द्रीय अनुसन्धान व्युरो (सीआइबी) ले चिनियाँ प्रहरीको सूचनाको आधारमा आपराधिक गतिविधिमा संलग्न १२२ चिनियाँ नागरिकलाई पक्राउ गरिएको जनाएको छ ।
बुधबार पत्रकार सम्मेलन गरी सीआइबीले चिनियाँ प्रहरीको सूचनाका आधारमा थालिएको निगरानीपछि १२२ जनालाई पक्राउ गरिएको जानकारी दिएको हो ।
सीआइबीका डिआइजी निरजबहादुर शाहीले चिलीमा आयोजित इन्टरपोलको ८८ औं सम्मेलनमा चिनियाँ प्रहरीले चिनियाँ नागरिकहरु पर्यटक भिसामा नेपाल आएर आपराधिक कृयाकलापमा संलग्न रहेकाले सहयोग गर्न आगह गरेपछि निगरानी सुरु गरेको बताए ।
डिआइजी शाहीले तारकेश्वर नगरपालिकाको मनमैजमा ५ घर, बाँसबारीमा ३ र बूढानिलकण्ठमा १ घरमा छापा मारेको जानकारी दिए । उनीहरुको साथबाट प्रहरीले ठूलो संख्यामा मोबाइल, ल्यापटप र सीमकार्ड लगायतका सामान बरामद गरेको छ ।
उनीहरुले विधुवा महिला, धनी महिला, युवावर्ग र व्यापारीहरुलाई जालमा पारी अनलाईन च्याट गराउने, नक्कली वेव बनाएर पैसा आउने लोभ देखाउँदै ठग्ने गरेको प्रारम्भिक अनुसन्धानका क्रममा देखिएको प्रहरीले जनाएको छ । प्रहरीले पक्राउ परेकाहरुमाथि अभद्र व्यवहारमा अदालतबाट म्याद थप गरी अनुसन्धान भइरहेको छ ।
