सरकार निरंकुशतातर्फ गयोः बाबुराम भट्टराई
काठमाडौं । समाजावादी पार्टी नेपालका संघीय परिषद अध्यक्ष डा. बाबुराम भट्टराईले संविधान संशोधनको मुद्दा लिएर अब आफूहरु सडकमा जाने बताएका छन् । सरकारलाई दिएको समर्थन फिर्ता लिन बुधबार आयोजित पत्रकार सम्मेलनमा भट्टराईले पहिचानमा आधारित संघीयता, शासकीय स्वरुप, नागरिकताको विषय, महिलाहरुको विभेदका विषयहरु पार्टी मुद्धा आफूले पहिलेदेखिनै उठाएको बताए ।
उनले संशोधनका लागि सरकारमा भएको समयमा सडकमा गएर दबाव दिन नमिल्ने अवस्थामा संसद र छलफलबाट कुरा अगाडी बढाउनुपर्छ भन्ने आफूहरुको ध्येय भएपनि प्रधानमन्त्री नै त्यसबाट पछि हटेकाले अब आफूहरु सडकमा जाने बताए । उनले भने, ‘अब उहाँहरुले नै बाटो खोल्नुभएको छ । अब सडकमा जान्छौँ ।’
भट्टराईले सरकार निरंकुशतातर्फ जाँदै गरेको आरोप लगाए । सरकारले ल्याएका केही मानव अधिकार विधेयक र सञ्चार विधेयक, व्यक्तिका निजी गोपनियतालाई समेत उल्लंघन गर्ने गरि गुप्तचर परिचलन गरी अधिकार दिनुले पनि सरकार निरंकुशतातर्फ गएको स्पष्ट भएको उनले बताए । सरकारी सम्पत्ति र राजदरबारबाट खोसेको सम्पत्ति कौडीको मूल्यमा दिएर सरकारले राष्ट्रघात गरेको उनको भनाई थियो ।