सरकार अपराध नियन्त्रण गर्न असफलतातर्फ उन्मूखः अध्यक्ष शर्मा
काठमाडौं । राष्ट्रिय मानव अधिकार आयोगका अध्यक्ष अनुपराज शर्माले नेपालमा कागजी मानव अधिकार मात्र रहेको बताएका छन् । ११ औं मानव अधिकार राष्ट्रिय भेलालाई काठमाडौँमा सम्बोधन गर्दै अध्यक्ष शर्माले नयाँ संविधान बने पनि काम कागजमा सीमित भएको बताएका हुन् ।
नयाँ संविधान अनुकुल बनेका नयाँ कानुनमा मानव अधिकारका धेरै सकारात्मक बिषय भएपनि कार्यान्वयन पक्ष फितलो रहेको उनले बताए । उनले भने, दण्डहीनता बढेको छ, महिला माथिको हिंसा बढेको छ, प्रहरीको तथ्यांक भन्छ अपराध बढेको छ यसले के देखाउँछ भने सरकार अपराध नियन्त्रण गर्न असफलतातर्फ उन्मूख छ’ ।
अध्यक्ष शर्माले देश संघात्मक संरचनामा गएपनि सरकार एकात्मक नै रहेको बताए । सरकारको प्रतिबद्धता, नयाँ संविधान र कानुन बलियो हँुदा पनि अवस्थामा परिवर्तन नहँुदा नेपालको मानव अधिकार कागजमामात्र भएको बताए ।
कार्यक्रममा अधिकारकर्मी चरण प्रसाईले संक्रमणकालिन न्याय टुंगोमा पुर्याउन सरकार र राजनीतिक दल नै अनिच्छुक रहेको आरोप लगाए ।
