‘सरकार कता हरायो’ भन्दै नेविसंघको प्रदर्शन
काठमाडौं । नेपाल विद्यार्थी संघले प्रधानमन्त्री केपी शर्मा ओलीको राजीनामा माग गरेको छ । भारतीय नक्सामा नेपाली भूमि समावेश गरिएपछि आक्रोशित हुँदै आएको नेविसंघले मंगलबार बिहान काठमाडांैको चाबहिलमा प्रधानमन्त्री ओलीको राजीनामा माग गर्दै विरोध प्रदर्शन गरेको हो ।
त्यस क्रममा उनीहरुले ‘सरकार कता हरायो, राष्ट्रियता जोगाउन डरायो’ भन्दै सरकारविरुद्ध चर्का नाराबाजी पनि गरेका थिए । नेविसंघ, काठमाडौं जिल्ला समितिको आह्वानमा आयोजना गरिएको विरोध प्रदर्शनमा राष्ट्रियता जोगाउन अपिल गर्दै सडकमा आउन सबैलाई अपिल गरिएको प्लेकार्ड समेत प्रदर्शन गरिएको थियो ।
नेविसंघले भारतले आफ्नो नक्सामा समावेश गरेको कालापानी, लिपुलेक र लिम्पियाधुरा फिर्ता नलिएसम्म आफूहरुको आन्दोलन जारी रहने चेतावनी दिएको छ । नेविसंघले भारत सरकारसँग नेपाली भूमि फिर्ता लिन माग गर्दै काठमाडौंलगायतका देशका मुख्यमुख्य सहरमा विरोध प्रदर्शन गर्दै आएको छ ।
