सञ्चारकर्मी झाको पुस्तक ‘पूनी पूनी होत विवाह’ को लोकार्पण
जनकपुरधाम । पत्रकार सुजीतकुमार झाद्वारा मैथिली भाषामा लिखित अनुसन्धानमूलक पुस्तक ‘पुनि पुनि होत विवाह’ सार्वजनिक भएको छ । सोमबार जनकपुरधाममा आयोजित एक समारोहका बीच उक्त कृति सार्वजनिक गरिएको हो ।
रामजानकी विवाह सम्बन्धमा लेखिएको पुस्तकको प्रकाशन मधेश सरकारको उद्योग, पर्यटन वन तथा वातावरण मन्त्रालयले गरेको हो । पुस्तकको लोकार्पण मधेश सरकारका भौतिक पूर्वाधार मन्त्री रामसरोज यादव र उद्योग पर्यटन वन तथा वातावरण मन्त्री शत्रुधन महतोले संयुक्त रुपमा गरेका थिए ।
पुस्तकलाई मधेश प्रदेश भित्र रहेका प्रदेश नगरपालिका गाउँपालिका, मन्त्रालय र प्रमुख कार्यालयमा राखिने उद्योग पर्यटन वन तथा वातावरण मन्त्री शत्रुधन महतोले जानकारी दिए ।
‘पुस्तकमा रामजानकीको विवाह सम्बन्धी महत्वपूर्ण कुरा आएको छ । बाहिरबाट जानकपुर आउनेहरुले पनि यो पुस्तक मार्फत जनकपुरका वारेमा जानकारी पाउने छन् ।’ मन्त्री महतोले भने । ‘पूनी पूनी होत विवाह’ पुस्तकमा मिथिलामा रामजानकी विवाह उत्सव र सीताको रामायणसँगको प्रसंगलाई उजागर गरिएको छ ।
त्रेता युगमा भएको भगवान् राम र सीताको विवाहको स्मरणमा प्रत्येक वर्ष मिथिलाको राजधानी एवं वर्तमान मधेस प्रदेशको राजधानी जनकपुरधाममा हुने विवाहोत्सवलाई पुस्तकमार्फत धर्म र संस्कृतिको उजागर गर्ने प्रयास गरिएको हो ।
पुस्तकमा लेखक झाले रामजानकी विवाह महोत्सवको पौराणिक संस्कृति, महत्व र आजको आवश्यकता सहितका विषयवस्तुलाई प्रस्तुत गरेका छन् । ६८८ पुष्ठको पुस्तकलाई यसअघि संघीय संस्कृति मन्त्रालय विद्यापति पुरस्कार कोषले एक लाखको पुरस्कार प्रदान गरिएको थियो ।
